Aragisha Inama:Umugore wanjye arashaka gusezerana n’undi mugabo

by http://urukundo.info
Twabanye dukundanye cyane urugo rwacu ari ntamakemwa, Twahuye twese dukijijwe kandi dusenga Imana ndetse turanasezerana mu itorero baduha n’imirimo yo gukora . Ubu hashize imyaka isaga itanu dukoze ubukwe. Nyuma yo kubyara umwana wa mbere yatangiye kujya ahinduka buhoro buhoro ariko simbihe agaciro cyane. Tumaze kubyarana umwana wa kabiri yahise aba nk’isasu ; akavugisha iry’inani, agahora arakaye yarigize intavugirwamo.

Ibyo byarabaye ndituriza kuko n’ubundi mu buzima ndi umugabo utuje cyane, nkunda gucisha make no guha abantu amahoro kandi w’umukristu . Naramuretse rwose akajya antuka nkamwihorera akikora ibyo ashatse byose nkamureka , nakwibaza impamvu ibimutera nkayibura kuko murugo rwacu ntacyari kibuze byose byari bihari.

Ndibaza ukuntu yagiye none akaba agiye kubana nundi mugabo nkabura uko nabyifatamo / foto : net

Tumaranye imyaka itanu, navuye kukazi ngeze mu rugo ndamubura ariko nsanga imyenda ye irahari, ubwo mba nkina n’abana mutegereje. Narategereje burinda bucya ataraza, mu gitondo cya kare ntangira kujya kubaririza mu baturanyi niba nta wamubonye, mbaririza no muri bene wabo bose ndamuheba.
Hashize icyumweru sinzi ukuntu narindimo nzenguruka mushaka nkubitana nawe ari kumwe n’umugabo mu modoka nziza, dukubitanye amaso ndamuhamagara cyane mbona yanyirengangije uwo mugabo ashatse guhagarika imodoka umugore aramubuza imodoka nyirukaho iransiga. Guhera uwo munsi nahise mbona ko umugore wanjye yantaye ku bushake ko ntakindi kibazo yagize mpagarika gukomeza kumushakisha .

Twabanye mubuzima bwiza kandi dufite umuryango umeze neza

Kubura umugore wanjye byanteye igikomere kinini cyane kiranzonga kuburyo kubyikuramo ari ikibazo. Nahise mfata icyemezo cyo kureka kumwirukaho ahubwo nkarera abana banjye neza nkabaha uburere bwiza kandi nkabitaho kuburyo ntacyo bazamburana.
Abana banjye uko ari babiri ubu nibo tubana nibwo buzima bwanjye ndabakunda cyane nabo bakankunda mbakorera ibyiza byose nshoboye, nkagira umwanya uhagije wo kubaganiriza no kubatembereza. Mu minsi yashize nibwo umugabo umwe duturanye yaje kundeba ambwira ko umugore wanjye ari hafi gukora ubukwe n’undi mugabo.
Narabihakanye cyane mubwira ko bidashoboka ariko najye nagiye ku Murenge ndabyibonera aho amalisiti amanitse. Igikomere natewe no kumubura nahise numva gitangiye kubyuka, nigira inama yo kumuha amahoro no kumureka agakora ibyo ashaka ko ntagahunda ze ngomba kwivangamo.

Mbigenze nte ??

Abagabo bagenzi banjye bari kungira inama yo kwica ubwo bukwe umugore akabanza akaka gatanya. Njye ndumva ibyo bizatuma igikomere cyanjye kigaruka ubuzima bwanjye bukajya hasi. Muri macye nataye umutwe , kandi mbona hari benshi babagezaho ibibazo baburiye igisubizo mukabagira inama . None njyewe mbigenze nte ko numva ntatuje ? Ese nimpagarika ubu bukwe sinzaba nkoze icyaha kandi nawe atazangarukira ? Nkeneye inama zanyu.

Related Posts by Categories